أخيرًا... إستبرق للبنات

أسهل حاجه إنك تعمل لبس للبنات، وأسهل حاجه إن اللبس يبقى مش متماشي مع أسس اللبس الشرعي.

إحنا بنحب نقول على نفسنا Trendsetters، يعني بنصنع الموضة، مش بنمشي معاها. من المنطقي جدًا للـbusiness إننا نعمل لبس للبنات من زمان، وخصوصًا إن ده المطلب الأول من قبل عملائنا، بس الخطوة دي كانت محتاجة مننا تفكير طويل وتريث لإننا مش هدفنا زيادة المبيعات وخلاص؛ أي منتج بنعمله لازم يعمل فرق فعلًا، لازم يبقى ليه معنى بجد ويبقى بيمثل قيمنا وبيأكد الرسالة اللي إحنا بدأنا عشانها.

من حوالي سنتين، بالفعل أطلقنا مجموعة من الـhoodies للبنات. كنا بنجرب كذا فكرة بعدد محدود من القطع وكان هدفنا نختبر المقاس ونوع اللبس وتقبل الناس للمنتج عشان ناخد الملاحظات دي ونطور، استعدادًا لليوم اللي هنعمل فيه لبس للبنات. دي كانت فترة بحث واختبار وما أعلنّاش عن المنتجات ولا كنا جاهزين ولا عايزين نقول إن بقى في ”إستبرق للبنات.“ ماكانش ده الهدف ساعتها.

في حاجات عجبت البنات وحاجات لأ، وفي حاجات عجبتنا وتمسكنا بيها وحاجات غيرناها أو لغيناها. من ضمن النظريات اللي تمسكنا بيها رغم مقاومة الناس ليها وقتها إننا نحط اللوجو بتاع إستبرق على الجيب اللي تحت، تجنبًا لوضع أي تصميمات في أماكن إحنا شايفين إنه لا يجب لفت الانتباه ليها. إضافة إلى إننا وسعنا وطولنا اللبس عشان آخر حاجه عايزينها إنه يبقى ضيق أو قصير. ومن المنطلق ده وسعنا وطولنا اللبس الرجالي كمان.

من أهم الحاجات اللي استفدناها من طول فترة البحث والتطوير إننا عملنا لوجو مخصوص للبنات. اللوجو الجديد مستوحى من القاف بتاعت إستبرق، لكن على شكل قلب مرسوم بالإيد. ومن فوقه شَرطة القاف عشان تأكد إنه لا زال إستبرق وإنه ماشي ”تحت“ نفس القيم وضمن نفس المجتمع. هدفنا إن البنات يفتخروا بتميزهم بشعارهم الخاص. شعار مجتمع إستبرق للبنات.

إنهارده هو اليوم اللي نقدر نقول بفخر إن إستبرق بقى فيها منتجات للبنات. ورغم إننا مش بندعي إن لبسنا "شرعي" ولا بنقول إنه بيحل المشاكل اللي عند البنات، بس على الأقل مش ضيق، مش قصير، مش معروض على موديل في الصور، مش مخالف. ربما يكون لسه مش مثالي، ويمكن مايعجبش كل البنات، لكن الحاجه الأكيدة واللي انتوا عارفينها عننا إننا بنطور من نفسنا كل موسم وبنسمع منكم وهدفنا نعمل منتج يتماشى مع متطلباتكم وأسلوب حياتكم. تابعونا وادعمونا وانصحونا وافتخروا معانا بالتطورات الكبيرة والصغيرة، لإن إستبرق هي مجتمعها.

وطبعًا عشان إحنا عارفين إن جزء كبير من البنات اللي في مجتمع إستبرق ليهم لبسهم الخاص اللي لا يتماشى معاه اللي بنقدمه في الوقت الحالي، عملنا شنط جديدة عشان تشيلي إستبرق معاكي كل يوم.